Үзгүлтүксүз билим берүү борборунун төрагасы тарабынан “Үнсүз кризис: ЖОЖ студенттеринде жалгыздык” аттуу семинар өткөрүлдү

Кыргыз-Түрк “Манас” университетинин Үзгүлтүксүз билим берүү борбору “Ар бир куракка, максатка ылайык билим” ураанынын негизинде уюштурган семинарлардын алкагында, 2026-жылдын 16-апрелинде SEM борборунун жетекчиси, проф. д-р Йүжел Өксүз тарабынан “Үнсүз кризис: ЖОЖ студенттеринде жалгыздык” аттуу семинар өткөрүлдү.

Семинарда жогорку окуу жайлардын студенттеринин арасында барган сайын кеңири жайылып жаткан жалгыздык феномени психологиялык, социалдык жана академиялык өңүттө кеңири каралды. Проф. д-р Өксүз жалгыздык жөн гана жеке сезим эмес экенин, ал студенттердин жашоо тажрыйбасына көп тараптуу таасир эткен олуттуу маселе экенин баса белгиледи. Айрыкча университетке өтүү мезгилиндеги адаптация кыйынчылыктары, таандыктык муктаждыгы жана социалдык байланыштарды кайра түзүү зарылдыгы жалгыздык коркунучун күчөтөрүн белгиледи.

Ошондой эле баяндамада жалгыздыктын академиялык жетишкендикке, мотивацияга жана жалпы жашоо сапатына тийгизген терс таасирлери талкууланып, бул абал менен күрөшүүдө социалдык колдоо механизмдеринин маанилүү ролу баса көрсөтүлдү. Студенттердин ортосундагы байланыштарды күчөтүү, университеттик чөйрөдө таандыктык сезимин арттыруу жана психологиялык кеңеш берүү кызматтарынын мааниси конкреттүү мисалдар менен түшүндүрүлдү.

Катышуучулардын чоң кызыгуусун жараткан семинар жалгыздык маселеси боюнча маалымдуулукту жогорулатып, студенттердин психологиялык жыргалчылыгын колдоого багытталган иштердин маанисин дагы бир жолу көрсөттү.