Орто жана Батыш Азиядагы дарыгерлерге онлайн түрк тили курсун ийгиликтүү аяктады

Кыргыз-Түрк «Манас» университетинин  Үзгүлтүксүз билим берүү борбору (ҮБББ) тарабынан 2025–2026-окуу жылынын жазгы семестринде Борбордук жана Батыш Азия Кулак, мурун, тамак жана баш-моюн хирургиясы биримдигинин мүчөсү болгон дарыгерлер үчүн уюштурулган онлайн түрк тили курсу ийгиликтүү аяктады. Окуу программасынын соңунда өткөрүлгөн сынактан ийгиликтүү өткөн 30 дарыгер сертификат алууга укуктуу болушту. 

Түрк тилинин эл аралык деңгээлде окутулушун колдоо жана түрк дүйнөсүнө кирген өлкөлөрдүн ортосундагы академиялык, маданий жана кесиптик кызматташтыкты чыңдоо максатында уюштурулган программага Казакстандан, Өзбекстандан, Түркмөнстандан жана Кыргызстандан адис дарыгерлер катышты. Онлайн форматта өткөрүлгөн окуулар КТМУнун Чет тилдер жогорку мектебинин окутуучуларынын академиялык колдоосу жана тажрыйбалуу мугалимдердин салымы менен жүргүзүлдү.

Программанын алкагында катышуучуларга А1 жана В1 деңгээлдеринде түрк тили окутулду. Окуу процессинде курсанттар окуу, жазуу, угуп түшүнүү жана сүйлөө көндүмдөрүн өнүктүрүү мүмкүнчүлүгүнө ээ болушуп, күнүмдүк баарлашуудан тартып академиялык жана кесиптик чөйрөдө түрк тилин колдонуу жөндөмдөрүн жогорулатышты. Айрыкча саламаттык сактоо тармагында эмгектенген дарыгерлердин түрк тилиндеги медициналык терминологияны өздөштүрүүсү жана түрк тилдүү өлкөлөрдөгү кесиптештери менен натыйжалуу байланыш түзүүсү максат кылынды.

Окуу программасынын соңунда өткөрүлгөн баалоо сынагынан ийгиликтүү өткөн жалпы 30 дарыгер сертификат алууга татыктуу болушту. Сертификаттар катышуучуларга электрондук форматта жөнөтүлдү. Муну менен алар түрк тили боюнча жетишкен деңгээлин тастыктаган маанилүү документке ээ болушту.

Бул программа тил үйрөтүү иш-чарасы гана болбостон, ар түрдүү өлкөлөрдөн келген саламаттык сактоо адистерин бир билим берүү аянтчасында бириктирип, тажрыйба жана маалымат алмашууга мүмкүнчүлүк түздү. Катышуучулар окуу процессинин алардын кесиптик өнүгүүсүнө жана түрк дүйнөсү менен болгон маданий байланыштарынын бекемделишине олуттуу салым кошконун белгилешти.

Кыргыз-Түрк «Манас» университетинин Үзгүлтүксүз билим берүү борбору тарабынан ишке ашырылган бул программа университеттин эл аралык деңгээлдеги билим берүү ишмердүүлүгүн кеңейтүү жана түрк тилинин жайылышына салым кошуу багытындагы иштеринин маанилүү мисалы болуп саналат. Университет түрк дүйнөсүнөн жана башка өлкөлөрдөн келген катышуучулар үчүн тил, кесиптик жана жеке өнүгүү багытындагы окуу программаларын уюштуруп, эл аралык билим берүү ишмердүүлүгүн өнүктүрүүнү улантууда.

Кыргыз-Түрк «Манас» университети жалпы тил жана жалпы маданият негизинде түзүлгөн академиялык көпүрөлөр аркылуу түрк дүйнөсүнүн келечегине салым кошууну улантып, ушундай билим берүү программалары аркылуу өлкөлөр ортосундагы достук, кызматташтык жана тилектештик байланыштарынын чыңдалышына көмөк көрсөтүүнү улантат.